Zitat von Heinz am 6. Dezember 2023, 11:50 Uhr

Dr bitzeli anderi Santiglaus.

Gschichte us em Lääbe vo der Sonja W.

Ich bi no e ganz glaine Pfupf gsi, wo mini Mamme und ich im Neubadquartier gwohnt hänn. Das isch e paar Trämlihüpfer vo der Pauluskirche ewägg gsi. Mini Mamme hett e Fründin kha die het e paar Stroosse wiiter vorne imene grosse alte Huus gwohnt.

Die Dame simmer amme go bsueche. Ich ha denn e Sirüpli bikoo und die beide Dame hän Tee trungge. Derzue hetts immer au no e Schtüggli Cake oder Gugelhopf gä. Do hets immer viel Rosinli drinn kha wo ich bsunders gärn gha ha.

Eimol, do isch öppis bsunders passiert. Mir sinn wie immer uf Bsuech gsi. Do sitzt im Wohnzimmer e grosse Maa mit eme riesige Schnauz. E bitzeli schüch han ich dä Herr agluegt. Er hett güetige Auge kha und me hett gmerggt dass dä Mensch öppis bsunders isch.

Ich lueg mini Mamme a, frog ganz lieslig, „ Mutti, isch das der Santiglaus“. Die beide Dame lache härzlig, au dä imposanti Maa lacht. Nei erklährt mir do mi Mamme, das isch der Herr Doggter Albert Schweizer. Weisch dä läbt in Afrika und macht gleini Negerli wo grangg sin wieder gsund.

Mini Äugli wärde immer grösser, jä, frog ich wiiter, isch das dört wo d Elefäntli här kömme? Me muess wüsse, zu sällere Ziit hets im Zolli fünf jungi Elefäntli kha wo amme bi mir hinde dure in Allschwilerwald sinn go schpaziere. Und das isch für mi immer s Gröschte gsi.

Und jetzt sitzt do eifach e so e Maa mit Schnauz wo dört wohnt wo d Elefäntli här kömme. Dass är e wältberüemt Arzt, Musiker und Philosoph isch, das han ich erschrt schpöter begriffe wo ich sini Büecher gläse ha. Aber wohne bi de Elefäntli, das isch für mi s Gröschte gsi.

sOWe2023.

 

Und wenn öpper die Gschicht lieber wott höre muss einfach uff dr unteri Link drugge.